පළමු වතාවට විභාග ශාලාවකදී නිදාගත්තෙමි !

මේක නම් බ්ලොග් පෝස්ට් එකක් ගහන්නම වටින සිද්ධියක්. මෙච්චර කල් තිබ්බ විභාග වලදී වේලාසනින් උත්තර ලියල ඉවර කළාම ටක් ගාලා එළියට ඇවිල්ලා IT Room එක පැත්තේ යන්නයි මම පුරුදුවෙලා හිටියේ. ඒ වුනාට සාපෙ වේලාසනින් ලියල ඉවර වුනා කියල එළියට එන්න දෙන එකක්යැ ?

ඔන්න ඉතින් අද තිබ්බ බුද්ධ ධර්මය පේපර් එකට පැය 3ක් වෙන්කරලා තිබ්බා. බහුවරණ කොටසයි රචනා කොටසයි දෙකම එකට තිබ්බේ. ඉතින් ඒ දෙකම ඉවර වෙනකොට ගත වෙලා තිබ්බෙ පැය 1 යි මිනිත්තු 15 යි ! (මගේ බුද්ධ ධර්මයට බුදුසරණයි !) කාලයෙන් තව හරි භාගයකටත් වඩා ඉතිරියි !

ඒපාර තව පාරක් ලියපු උත්තර ටික කියෙව්වා. අප්සට් එකක් නෑ, ප්‍රමාණවත්. මොකද 2 කොටසෙ අනිවාර්ය පළමු ප්‍රශ්නය හැරෙන්නට තෝරාගන්නට තිබිනු ප්‍රශ්න 4 තිබ්බේ කොටස් 3 බැගින්. පළමු කොටස් දෙක බොහෝ ප්‍රශ්න වල තනි වාක්‍යයෙන් උත්තර ලියන්න පුළුවන් එව්වා, 3 වෙනි ප්‍රශ්නය තමයි ඡේදයක් දෙකක් ලියන්න වෙලා තිබ්බේ. ඒ වුනත් ඒකටත් උත්තර ඉල්ලලා තිබ්බේ “සැකෙවින් පිළිතුරුදෙන්න” කියලා. ඉතින් මං පුළුවන් තරං සැකෙවින් ලිව්වා ! ඒ වුනාට සමහර කස්ටිය ලියල තිබ්බා පිටුවක් විතර පිරෙන්න එක ප්‍රශ්නෙට.

ඉතින් කරන්න වෙන වැඩකුත් නැති එකේ ටිකක් මේසෙට ඔළුව තියාගෙන හාන්සිවෙලා හිටියා. බැලින්නම් මෙන්න නින්ද ගිහිල්ලා ! ඒක තමයි මම ජීවිතේ පළමුවැනි වතාවට විභාග ශාලාවක නිදාගත්තු අවස්ථාව !! ඇහැරිලා බලනකොට මිනිත්තු 25ක් විතර නිදාගෙන.

පස්සෙ සාක්කුවට අත දාල බලනකොට ඒකෙ තිබ්බා රුපියලේ කාසියක්. තව විනාඩි පහළොවක් විස්සක් ඒක රෝල් කර කර හිටියා. ආපහු ඉතින් චුට්ටක් හාන්සියක් දැම්මා ඒපාරත් විනාඩි දහයක් විතර නින්ද ගිහිල්ලා. ඇහැරෙනකොට පොඩි වැස්සක් පටන්අරන් තිබුනු නිසා වතුර බින්‍දු වැටෙන දිහා බලන් හිටියා.

කොහොම කොහොමහරි ඉතිරි වෙලාවත් අමාරුවෙන් ගෙවල දාලා විභාගෙ ඉවර වුනාට පස්සෙ එලියට එනකොට අකුරැස්ස – මාතර බස් එකක් නවත්තං ඉන්නව ගේට්ටුවගාව. ඒක නැතිවෙන්න මිනිස්සු හිරවෙලා. ඉතින් මම මොකටද ඒකෙ හිර වෙලා යන්නේ ? මමයි තව බුවෙකුයි හිටියා තව බස් එකක් එනකම්. අරක ගියා විතරයි ඊට පස්සෙ ආපු බස් එක ඉස්කෝලෙ සෙට් එක ගෙනියන්න ආපු බස් එකක් වගේ ! අපි ඒකේ ආතල් එකේ ආව. අර අපිට කලිං තද වෙලා ආපු බස් එක ගාට ගාට එනකොට අපි ටාර් ගාලා ස්ටෑන්ඩ් එකට ආවා. රාහුලේ ඉඳන් ස්ටෑන්ඩ් එකට එන්න විනාඩි දහයකට වඩා යන්නෙ නැහැනේ ? කොහොමහරි හක්මණ එන බස් එකේ හොඳ නින්දක් දාන්න හිතාගෙනයි ආවෙ. කොහේද, බස් එකේදි පාවිච්චි කරන්න තිබ්බ නින්ද නේ විභාග ශාලාවෙදි පාවිච්චි කරල තියෙන්නේ, අපරාදේ !!

විභාග ශාලා වලදී කම්මැලි වෙලාවට කරන්න දේවල් ලිස්ට් එකක් දෙන්න, කස්ටිය මට සපෝට් එක දෙන්න !!