ඉන්‍දියාවේ විමුක්තිකාමීන් (?)

ඔන්න ඉන්‍දියාවටත් ත්‍රස්තවාදී ප්‍රහාර එල්ල වෙලා.

නමුත් මම විරුද්ධයි ඒ ප්‍රහාර එල්ල කරපු අහිංසකයොන්ට “ත්‍රස්තවාදීන්”ය කියල කියනවට. අපි ඒගොල්ලොන්ට කියමු “විමුක්‍තිකාමීන්”ය කියල. මොකද ඒවගේ ප්‍රහාර එල්ල කරන්නත් ඒ පොඩිවුන්ට හේතුවක් තියෙන්න එපැයි. නිකංම “ත්‍රස්තවාදීන්”ය කියන එක හරි නැහැ නොවැ ?

ඒගොල්ලො ප්‍රහාර එල්ල කරන එක අනුමත කරන්න පුළුවන්, නමුත් ඉන්‍දියන් ආණ්‍ඩුව ඒගොල්ලන්‍ට ප්‍රහාර එල්ලකරන එක හරිද මම අහන්නේ ? ඇයි අප්පා, ඒගොල්ලොන්ට එල්ල කරන ප්‍රහාර ඒ අය විසින් ඔය කියන හෝටලයේ රඳවන් ඉන්න අහිංසක සිවිල් ජනතාවට වැදෙන්න පුළුවන් නොවැ ? මම නම් කියන්නේ කාටවත් ගහන්නෙ නැතිව “දේශපාලන විසඳුම”කට එන්න අපි ඉන්‍දියන් රජයට බල කරන්න ඕනය කියලයි.

ශ්‍රී ලාංකික කලාකරුවොන්ටත් මේකට දායක වෙන්න පුළුවන්. ඉන්‍දියන් රජය වහාම “විමුක්‍තිකාමීන්”ට ප්‍රහාර එල්ල කරන එක නවත්වලා ඒගොල්ලො ඉල්ලන දොළ-පිදේනි ඔක්කොම දෙන්නය කියල උපවාසයක් කරමු !

අනිත් අතට අපේ දේශපාලන පක්‍ෂවලටත් පුළුවන් මේ ගැන එක එක විකාර කියවල තම තමංගෙ ඡන්‍ද ගොඩ වැඩි කරගන්න. ඔය රජයේට සම්බන්‍ධවෙලා ඉන්න පක්‍ෂයකට පුළුවන් “ඉන්‍දියන් අර්බුදය” පිළිබඳ ශ්‍රී ලංකා ආණ්ඩුව ක්‍රියාමාර්ගයක් නොගත්තොත් ඒ කට්ටිය රජයෙන් අයින්වෙනවය කියල ලොකු ප්‍රචාරය්ක ගෙනියන්න. ඇත්තටම ඉල්ලා අස්වෙන්න ඕන නැහැ. ටික දවසක් ඕක තැන තැන යි මාධ්‍ය වලයි කිය කියා ඇවිද්දම ඇති !